[ طبق رئيسي ] طبخاتنا اليومية بالصور ..

rosemary.yt

عضو جديد
المشاركات
6
النقاط
3

معكرونه بالبشميل ... حلاتها في هالجو :love::delicious:

** حبيباتي اذا تحبون تدعمون اختكم البحرانيه ادعمو قناتي اليوتيوب بعمل سبسكرايب و شير :shy::seenoevil::rose:
ما تتصورون اي قد بتساعدوني وبكون ممتنه ليكم3>

(ضغطي على شعار القناه الدائري اللي في الفيديو و بعدين subscribe )
 

خذاني الشوق

مشرفة إبداعات مطبخية، نسائيات، التربية والتعليم
المشاركات
5,018
النقاط
128
٢٠١٨١١٢٨_١٩٢٤٤٤.jpg


باستا لذييذة وسرييييييعة

* سلقت الباستا بالطريقة المعتادة.
* شوحت ثوم مع شوي زيت زيتون لما طلعت ريحته ضفت الخضروات والدياي ونحركه على نار عالية لين تنضج المكونات ضفت له صلصة الباستا ( نص قالب زبدة ذوبته وقليت معاه 3 ملاعق طعام طحين لين تغير لونه شوي ضفت له الحليب بالتدريج مع التحريك المستمر لين تغلظ ضفت 4 ملاعق طعام جبن سائل وقيمر ورشة ملح وفلفل أسود ).
* ضفت الاوريغانو والباستا وجبن موزاريلا وخليتها تطبخ شوي على نار عالية حق تنمزج المكونات وبس بالعافية
 

خذاني الشوق

مشرفة إبداعات مطبخية، نسائيات، التربية والتعليم
المشاركات
5,018
النقاط
128
٢٠١٨١٢٢١_١٢٤٦١٦.jpg


جوكلت كيك بكريمة الجلكسي واللوتس


* كيك بتي كروكر الشوكلاته السوداء اسويها مثل ما مكتوب عالعلبة ،، اخليها تبرد تماماً واقلبها ..

* اسوي كريمة الجلكسي ( ملعقة طعام زبدة + 3 جلكسي سادة + 1 قيمر كبير + ربع كوب حليب ) نذوبهم بحمام مائي.

* اسوي ثقوب في الكيكة واصب الكريمة.

* اسخن اللوتس سوس وارشه عالوجه بشكل خطوط وبعدين ازين الوجه.

وبالعافية
 

خذاني الشوق

مشرفة إبداعات مطبخية، نسائيات، التربية والتعليم
المشاركات
5,018
النقاط
128
٢٠١٩٠٣١٩_١٤٤٤١٣.jpg


بشميلتي اللذييذة


اطبخ المعكرونة بنفس الطريقة الموجودة على العلبة واخليها على جنب ،،
اسوي صلصة البشاميل عبارة عن ( نص قالب زبدة اذوبه واضيف له 3 ملاعق طعام طحين واقلبه معاهم بعدين اضيف لتر حليب ورشة ملح وفلفل اسود ومكعب ماجي واقلبه بإستمرار لين تكثف الصلصة واشيل شوي منه حق الوجه واخلط الباقي مع المعكرونة).
اسوي الحشوة ( اشوح بصل مفروم ولما يذبل ويتحمر لونه شوي اضيف له فص ثوم مقطع صغار وبعدين اضيف طماطتين مبشورين واضيف اللحم المفروم يكون على نار عالية لين يتغير لون اللحم اضيف الملح والبهارات ومكعب ماجي ومعجون طماط وشوي ماي واخليه يطبخ شوي وبس بتكون جاهزة.

اسوي الطبقات في البايركس معكرونة حشوة معكرونة وبعدين صلصة البشاميل وجبن مبشور وجبن سليس وادخله الفرن لين يذوب الجبن وبالعافية


٢٠١٩٠٣١٩_١٥٢٦١٠.jpg



الطعم لذيييييييذ


٢٠١٩٠٢١٤_١٩٢٤٤٨.jpg


كيك عقيلي بطريقة الشيف أسامة القصار


5 بيضات
كوب سكر
كوب زيت
كوب حليب سائل ( اني انقع فيه زعفران من قبل عشان يطلع لون الكيكة حلو وطعم الزعفران مركز)
كوبين طحين منخول (استعمل طحين فاخر)
ملعقة طعام هيل مطحون
ملعقة طعام منقوع ماي ورد بالزعفران
ملعقتين طعام بيكينغ بودر منخول

الطريقة:-

نخفق البيض بالخلاط الكهربائي لمدة 5 دقايق وبعدين نضيف عليه الزيت والسكر ونخليه يخلط شوي بعدين نضيف له كوب الحليب ونستمر بالخفق بعدين نضيف عليه الطحين والبيكينغ بودر بالتدريج حتى يتجانس وبعدين نضيف الهيل ومنقوع الزعفران.

ندهن قالب الكيك بالهردة ( الطحينة ) والسمسم ونصب خليط الكيك وندخله الفرن يكون مسبق التسخين على حرارة 180ْ لمدة 25 إلى 30 دقيقة .. بعد ما نطلعها من الفرن نخليها تبرد شوي ونقلبها وبالعافية
 
آخر تعديل:

مناميه88

عضو متميز
المشاركات
1,178
النقاط
83
عليكم السلام .. حياش حبيبتي منوورة

انقعي العدس لمدة ساعه وعقب اسلقيه ويه ملعقة طعام بيكينغ بودر من يطبخ شيلي الزبد الا فوقه وقصري عليه بس حاسبي للفرن لان اذا غطيتينه وفيه بيكينغ بودر يفوض فخلي فتحة شوي عشان ما يفوض لش .. وخليه يطبخ 45 دقيقة او لين يلين تماماً ..

في قدر ثاني حمسي بصل لين يذبل ضيفي له ثوم وتابل واسبنت إلي تحبين واني احط آلو مبشور واقلبه وياهم واحط بعدين مكعب ماجي وملح وبهارات خفيفة ( كركم كمون كزبرة فلفل أسود وبهارات مخلوطة ) حطي بهارات شوي مو حلو بهارات واجد في العدس تضيع نكهته وضيفي معجون طماط وقلبي وياهم وعقب ضيفي خليط العدس الي طبختينه وقلبيه وخليه يطبخ بعد عشان يتسبك ويلين شوي الآلو وبس بالعافية

يصير لذييذ

شكررراً ان شاءالله راح اجربها
 

خذاني الشوق

مشرفة إبداعات مطبخية، نسائيات، التربية والتعليم
المشاركات
5,018
النقاط
128
٢٠١٩٠٣٢٩_١٤١٣٢٧.jpg



٢٠١٩٠٣٢٨_٢٣٤٤٢٤.jpg



٢٠١٩٠٣٢٩_١٤٢١٥٦.jpg



~ كيكة الحليب بالزعفران ~

المقادير:-

للكيكة:-

100 جرام زبدة (حرارة الغرفة )
نص كوب سكر
4 بيضات كبار
كوب ونص طحين فاخر
ملعقة طعام بيكينغ بودر
رشة ملح
رشة فانيلا
رشة زعفران

لسوس الحليب:-

2 كوب ونص حليب ( انقعه بزعفران قبل فترة عشان يتركز الطعم)
علبة حليب أبو قوس
نص كوب كريمة خفق
علبة حليب محلى

للتزين بالكريمة:-

2 ظرف دريم ويب
1 قيمر كبير
شوي حليب بااارد

الطريقة:-

اخلط الزبدة والسكر بالخلاط لين يصير كريمي اضيف البيض وحدة تلو الأخرى ،، بعدين اضيف المكونات الجافة (منخول) اذا صارت ثقيلة العجينة اضيف شوي ماي عشان تتحرك شوي ..

نحط العجينة ببايركس مدهون وندخله الفرن حرارة 180 لمدة نص ساعه او لين تستوي ..

على ما تستوي الكيكة في الفرن نجهز سوس الحليب ،، اسخن الحليب لحد الغليان وعقب ارفعه عن النار واضيف باقي المكونات واخلطه ..

نطلع الكيكة من الفرن ونخليها تبرد تماماً بعدين اسوي فيها ثقوب كبيرة واشربها بسوس الحليب بالتدريج .. وما اخلص كل الكمية اخلي شوي لوقت التقديم ..

اخلط مقادير الكريمة بالخلاط لين تصير الكريمة ثقيييلة وغليظة واغطي الوجه بالكريمة وبعدها ازين بالورد والزعفران والفستق واللوز المبشور وخلوها في الثلاجة تبرد ليلة كاملة وبعدين عليكم بالعافية ... :delicious::delicious::delicious:



ترى الكيكة لذييذة لذييييييذة لذيييييييييييييييييييييذة ضروري تجربون تسوونها مع صورة للقسم يلا ما اشوف في ابداعات نايميين :laugh2:
 
آخر تعديل:

بنت-الاسلام

عضو نشيط
المشاركات
389
النقاط
43
مشاهدة المرفق 111919


مشاهدة المرفق 111920


مشاهدة المرفق 111921


~ كيكة الحليب بالزعفران ~

المقادير:-

للكيكة:-

100 جرام زبدة (حرارة الغرفة )
نص كوب سكر
4 بيضات كبار
كوب ونص طحين فاخر
ملعقة طعام بيكينغ بودر
رشة ملح
رشة فانيلا
رشة زعفران

لسوس الحليب:-

2 كوب ونص حليب ( انقعه بزعفران قبل فترة عشان يتركز الطعم)
علبة حليب أبو قوس
نص كوب كريمة خفق
علبة حليب محلى

للتزين بالكريمة:-

2 ظرف دريم ويب
1 قيمر كبير
شوي حليب بااارد

الطريقة:-

اخلط الزبدة والسكر بالخلاط لين يصير كريمي اضيف البيض وحدة تلو الأخرى ،، بعدين اضيف المكونات الجافة (منخول) اذا صارت ثقيلة العجينة اضيف شوي ماي عشان تتحرك شوي ..

نحط العجينة ببايركس مدهون وندخله الفرن حرارة 180 لمدة نص ساعه او لين تستوي ..

على ما تستوي الكيكة في الفرن نجهز سوس الحليب ،، اسخن الحليب لحد الغليان وعقب ارفعه عن النار واضيف باقي المكونات واخلطه ..

نطلع الكيكة من الفرن ونخليها تبرد تماماً بعدين اسوي فيها ثقوب كبيرة واشربها بسوس الحليب بالتدريج .. وما اخلص كل الكمية اخلي شوي لوقت التقديم ..

اخلط مقادير الكريمة بالخلاط لين تصير الكريمة ثقيييلة وغليظة واغطي الوجه بالكريمة وبعدها ازين بالورد والزعفران والفستق واللوز المبشور وخلوها في الثلاجة تبرد ليلة كاملة وبعدين عليكم بالعافية ... :delicious::delicious::delicious:



ترى الكيكة لذييذة لذييييييذة لذيييييييييييييييييييييذة ضروري تجربون تسوونها مع صورة للقسم يلا ما اشوف في ابداعات نايميين :laugh2:
مبددددعة دايما ماشاءالله
 

خذاني الشوق

مشرفة إبداعات مطبخية، نسائيات، التربية والتعليم
المشاركات
5,018
النقاط
128
٢٠١٩٠٤٢٦_١٧٣٧٥٢.jpg



~ بسبوسة الشوكلاته بالجلاكسي ~

المقادير:-

* 3 بيض

* استكانة دهن
* رشة فانيلا
* ملعقة طعام بيكينغ بودر
* ملعقة طعام كاكو بودرة
* ملعقة طعام نسكافيه
* 1 قيمر نستله ( القوطي الحديد) وبنفس العلبة نعبي باقي المقادير إلي تحت :down:

1 ونص سميد

1 سكر

1/2 جوز الهند


للتغطية:-

* علبة حليب محلى

* 2 جلكسي ساااادة


الطريقة:-

نخلط المقادير السائلة وبعدين الجافة ونحطه ببايركس مدهون وندخله الفرن حرارة 180 لمدة 25 دقيقة او لين تستوي ..


أول ما نطلعها من الفرن نصب عليها الحليب محلى كاااامل وبعدين نبشر 1 جلكسي نتظرها تبرد شوي ونبشر الثاني وبالعااافية :delicious::ok:
 

خذاني الشوق

مشرفة إبداعات مطبخية، نسائيات، التربية والتعليم
المشاركات
5,018
النقاط
128
السلام عليكم

مبارك عليكم الشهر

يلا نبغي ابداعات شهر رمضان
عليكم السلام

علينا وعليش حبيبتي من عواااده

اييييييي يلا انطلقووو وراوونا الابداع
 

خذاني الشوق

مشرفة إبداعات مطبخية، نسائيات، التربية والتعليم
المشاركات
5,018
النقاط
128
٢٠١٩٠٥٢٣_٠٠٥٣١٦.jpg

محلبية السميد

المقادير:-


2 بيض
نص قلاص سميد
نص قلاص سكر
ماء ورد وزعفران
4 قلاصات حليب
قيمر

الطريقة:-


نخلط جميع المقادير ما عدا القيمر في الخلاط وعقب نحطه في القدر على النار مع التحريك المستمر لين تغلظ نسكر عليها ونخليها تبرد بعدين نضيف لها القيمر ونخلطه بالخلاط ونصبه في البايركس مع التزيين بإلي تحبونه وتدخلونها الثلاجة تبرد .. وبالعااافية

٢٠١٩٠٥١٨_١٩٢٧١٢.jpg




كريم كراميل في الفرن

المقادير:-

5 بيضات كبار
2 قلاص حليب بودرة
4 قلاصات ماي
ملعقة شاي خل
زعفران
ربع قلاص سكر
حليب محلى
قيمر

نخلطهم بالخلاط على دفعات لان ما بيستوعب الكمية كلها .. نكرمل الشكر ونحطه بقاع البايركس وبعدين نحط خليط الكريم كراميل ونخليه بحمام مائي وندخله الفرن لمدة ساعه الى ساعه وربع على حرارة 200ْ وبعدين لما نطلعه نخليه يبرد تماماً وندخله الثلاجة ليلة كاملة

وهذا شكله قبل لا اقلبه

٢٠١٩٠٥٢٣_٠١٢٥٥٠.jpg





 
آخر تعديل:

حزينة بدنيتي

عضو متميز
المشاركات
1,557
النقاط
113

محلبية السميد

المقادير:-


2 بيض
نص قلاص سميد
نص قلاص سكر
ماء ورد وزعفران
4 قلاصات حليب
قيمر

الطريقة:-


نخلط جميع المقادير ما عدا القيمر في الخلاط وعقب نحطه في القدر على النار مع التحريك المستمر لين تغلظ نسكر عليها ونخليها تبرد بعدين نضيف لها القيمر ونخلطه بالخلاط ونصبه في البايركس مع التزيين بإلي تحبونه وتدخلونها الثلاجة تبرد .. وبالعااافية

مشاهدة المرفق 112625



كريم كراميل في الفرن

المقادير:-

5 بيضات كبار
2 قلاص حليب بودرة
4 قلاصات ماي
ملعقة شاي خل
زعفران
ربع قلاص سكر
حليب محلى
قيمر

نخلطهم بالخلاط على دفعات لان ما بيستوعب الكمية كلها .. نكرمل الشكر ونحطه بقاع البايركس وبعدين نحط خليط الكريم كراميل ونخليه بحمام مائي وندخله الفرن لمدة ساعه الى ساعه وربع على حرارة 200ْ وبعدين لما نطلعه نخليه يبرد تماماً وندخله الثلاجة ليلة كاملة

وهذا شكله قبل لا اقلبه

مشاهدة المرفق 112626




طبقت اليوم محلبية السميد تسلم الايادي


Sent from my iPhone using mBahrain mobile app
 

خذاني الشوق

مشرفة إبداعات مطبخية، نسائيات، التربية والتعليم
المشاركات
5,018
النقاط
128
ماعليكم امر
ابي طريقة معكرونة البشاميل للدجاج ولا مرة سويتها ممكن !!


Sent from my iPhone using mBahrain mobile app
تفوحين المعكرونة وتخلينها على جنب
تسوين صلصة البشاميل نص قالب زبدة تحمسينه ويه ٣ ملاعق طعام طحين جميع الاستعمالات وتقلبينه شوي عقب ضيفي لتر حليب وشوي ملح وفلفل اسود ومكعب ماجي مع التحريك المستمر لين تغلظ حطي عليها ٣ ملاعق طعام جبن قلاصات ودوريها وخليها على صوب ..

سوي الحشوة حمسي البصل لين يذبل ويصير لونه ذهبي ضيفي له جزر مبشور وفلفل بارد صغار لما يذبل ضيفي له دياي مسحب والو مقطع صغار ومقلي وضيفي الملح والبهارات وشوي معجون طماط وماي وبس خليها تطبخ دقايق وتكون جاهزة

خلطي المعكرونة وصلصة البشاميل عقب سوي الطبقات في البايركس طبقة معكرونة عقب الحشوة عقب معكرونة وعقب جبن سليس ودخليها الفرن لين تجهز
 

خذاني الشوق

مشرفة إبداعات مطبخية، نسائيات، التربية والتعليم
المشاركات
5,018
النقاط
128
٢٠١٩٠٥١٨_١٩٢٤٢٥.jpg


جيز كيك بصلصة البلوبيري

الطبقة الاولى:- علبة صغيرة بسكوت دايجستف مطحون كاملة + اصبع زبدة مذوب (١٠٠ جرام) نخلطهم مع بعض عدل لين تصير الزبدة بكل البسكوت عقب نرصها بقالب الجيز كيك او أي بايركس تبونه ..

الطبقة الثانية:- ٥ حبات جبن كيري + قيمر كبير + ٢ ظرف دريم ويب + شوي حليب بارد نخلطها عدل بالخلاط ونضيفها على الطبقة الاولى.

ندخل البايركس الثلاجة عشان تجمد الطبقة وعقب نحط فوقها بلوبيري سوس جاهزة ( ماركة امريكان جاردن ) تكون الصلصة باردة بالثلاجة عشان لا تسيح ونرجع الجيز كيك عقب في الثلاجة يبرد على الاقل ساعتين ..

وعقب بالعافية السويت عجيييب بس اهم شي تسوون طبقة الكريمة كثيفة عشان ما تسيح تكون ثابتة اني ما احتجت احط لا جيلاتين ولا شي كانت متماسكة وثابتة لان طبقة الكريمة كثيفة وغليظة

وهني وعافية
 
 
مركز البحرين التجاري غير مسؤول عن أي اتفاق تجاري لا يكون طرفاً فيه. لذا يتحمل الطرفان البائع والمشتري المسؤولية القانونية الكاملة.
يتحمل كل عضو المسؤولية القانونية الكاملة دون مركز البحرين التجاري في أي تعليق ينشره في صفحات المركز وأقسامه.
 
الأعلى