ابني عمره ١٠ شهور وما يرضى ياكل شنو الحل ؟

الحاله
مغلق

عاشقة حيدر 92

عضو متميز
المشاركات
965
النقاط
93
السلام عليكم ورحمه الله وبركاته
شخباركم، اعاني من مشكله مسببه ليي ارق ومتعبتني لدرجه اني اصيح ساعات منها وهي ابني، عمره ١٠ شهور وما يرضى ياكل وما يحب شي اني أنوع له ف الاكل اعطيه سيريلاك وفارليز وبسكويت أصابع وأكل بيت سمج ، عيش، دجاج، شوربه، خبز، روتي، ورب وكل شي باستثناء لحم وربيان وعسل وحلاوه وخرابيط اجباس وجدي ما اعطيه ويتعبني ما يرضى ياكل شي ولا يحب شي وخصوصا اذا اعطيه اكل بالملعقة جنه ف معركه اني وياه اصارخ واعصب عليه ويقعد يصيح وأصيح اني بعد ع هالحال ما ودي اعصب عليه وأحاول أمسك أعصابي واسايسه لكنه واجد صعب وما يهتم ولا ينتبه ليي وكله يبغي يتحرك ويعفس الدنيا ع ما ياكل له حبة لقمه ياخد ساعه ويطلع روحي واجد تعبانه وياه ولا ادري ويش اسوي وهي اول ولد ليي وجه عقب تعب وعلاج وأني احبه واضايق اذا اعصب عليه لكن ويش اسوي شوروا عليي، وترا ما ظل شي ما حاولته حطيته له ف صحون ملونه وملاعق وأشغل له التلفزيون ساعات وهو بياكل وأقول له هم هم واكلمه واتحايل فيه ولا في فايده ما يرضى يقعد ف مكان ولا ياكل واذا كلش ياكل وهو يدور مني ومناك
 

واثقة

عضو متميز
المشاركات
1,327
النقاط
128
توني شايفة كلام لاخصائية تغذية تتكلم عن هالشغلة.. تقول في "قاعدة" لتغذية الطفل.. (ملعقة واحدة لكل سنة) يعني اذا الطفل عمره سنتين نقدم له ملعقتين من العيش مثلا، حتى اذا كان قليل عليه، من الافضل تقديم كمية صغيرة، و نسمح له بطلب الزيادة بدلا من تقديم كمية كبيرة من الاكل.

عجبتني القاعدة، لان تحفز الطفل يآكل بطريقة معتدلة ويطلب المناسب لاحتياجه، لان الجسم سبحان الله ذكي من الله و يعرف شكثر يحتاج من أكل، بالنسبة للطفل أكيد راح يبكي و يصرخ في حال الجوع و عدم الإكتفاء.

وهذا أمر فسيولوجي ماله دخل بذكاء الانسان أو فئته العمرية.. موجود بجسم الانسان لحمايته من خطر الموت جوعاً.​
 

زهوور الجبل

عضو متميز
المشاركات
4,183
النقاط
113
لا تحاولي تجبريه علی الأكل دعيه يأكل عندما يحس بالجوع في عمر طفلش واضح انه يشرب حبيب زيادة وهذا هو سبب عدم رغبته بأكل حاولي أن تقدمي له الأكل دائما قبل الحليب اول ما يصحی من النوم سيكون جائع علی طول جهزي له الطعام بانتظام سوف ترين انه يأكل برغبة وليكن الحليب بعد الأكل
 

نملة بحرانية

عضو متميز
المشاركات
475
النقاط
63
ذكرتي انه ما يقعد في مكان وحركي.. فهل جربتي سكون بكرسي اطفال؟ اني ولدي قده.. ساعات يرضى يقعد بدون شي.. وساعات بكرسي الاكل.. واخليه بعض الوقت بالمشايه.. ويروح ويجي وياكل..
وهل يشوفش تاكلين؟ شجعيه بالمشاركة.. ولدي يستمتع بوقت الاكل اكثر وياكل اكثر اذا كنت اكل وياه.. وصار من يشوفني قاعدة باكل يجي يقعد صوبي ينتظر
 

Alaawi

عضو متميز
المشاركات
5,047
النقاط
128
شوفوا له شي يحبه واعطوه اياه سواء كان فواكه او خضروات او اي شي

المهم انه يغطي احتياجاته اليومية ويشبعه

مو شرط الطفل ياكل الا انتون تبونه ياكله


بنتي تاكل نوعية محددة من الفواكه مثلا
غيرها ما تفكر حتى تجربها
اضطر اخذ لها الا تاكله وما احاول اجبرها تاكل غيره.. احيانا احاول وياها وتاكل بس اغلب الاحيان لا.
 

umhamood84

عضو متميز
المشاركات
929
النقاط
93
مثل ما قالت أخت زهور الجبل قللي كمية الحليب لأنها تشحن بطنه فما بصير في مجال ياكل ومره على مره بيتعود وبخصوص السيريلاك حطي ملعقه في الرضعه مالته بحيث يكون سائل مو ثقيل عشان يتقبله كأنه حليب عادي، و قبل الوجبة بساعتين ممنوع منعاً باتاً ان يدخل بطنه اي شيء وبتلاحظين الفرق، وبعض الأطفال ما يحبون احد يأكلهم فحطي ليه الأكل بطبق مع ملعقه وخليه ياكل بروحه جربي ولا تحاولين تجبرينه لأن الطفل في هذي الحاله راح يكون عنده شعور التحدي وما راح ياكل عناد بس، يعني حاولي تصبرين نفسش ولا تحاتين واجد أطفال نفس حالتش وعن نفسي اول طفل لي كنت أأكله غصب عن طريقة الأبره أشحنها سيريلاك وأدعسها في حلقه هههه بس عقب ما اتبعت مقوله اللي ياكل على ضرسه ينفع نفسة أرتحت واجد وصرت الحين اخش الأكل عنهم لا يخلص هههههه وبالتوفيق اختي
 

زهوور الجبل

عضو متميز
المشاركات
4,183
النقاط
113
نقطة مهمة لا تتنرفزي وتعصبي أمامه ترى الطفل ذكي جدا بمجرد رأيتك وانتي معصبة سيتنرفز هو أيضا ويعاند وما يأكل حتی لو هو جائع حطي بالك :)
 
المشاركات
76
النقاط
8
شوفي قريت بالانستقرام من اخصائيين تغذية ان لاتجبرين الطفل ياكل مثل ماتببن هو صغير معدته صغيرة ولاتخافين ماراح يموت جوع جسم الانسان ذكي ولوجاع بيجبره ياكل اي شي يعني هو طفل بالعقل مايصير غصب ياكل مثلنا احنا الكبار نفس ماقالو قاللي المرضعة خلي لوقت النوم بس اذا يشرب مرضعة بتشبعه شي طبيعي معدتهم صغيرة الجهال وثاني شي لازم تخلين وقت منظم للاكل وتاكلون كلكم جميع الاكلات الي تناسبه اكليها مثلا العسل ممنوع لاقل من سنة لان في بكتيريا ماتناسبهم واعتقد سمج والبيض نفس الشي يمكن عطيتيه حلاوة او جبس؟ اذا عطيتيه هالشي بسن مبكر معناته خربتينه ومابياكل فواكه وخضرة اول شي الوحدة لازم تبدي بالخضرة عقب الفواكه وموغصب تحسسينه سويه وقت مرح واكلو وياه بيتشجع ونفس ماقلت موتغصبونه شبع خلاص خلوه اما بتعاندين الا غصب كل بيعاند اكثر خليه وبعدها جربي بعد فترة اكل قليل كل فترة وهو اصلا لين جاع مابيسكت هم رضع ولين جاعو يصيحون ويفزعون شلون كبر لاتخافين تراني مجربة من صغري اكلي كلش قليل بس امي عادي ماتحن وتغصبني بالعكس كبرت صرت عادي وللحين اشبع بسرعة بس الحمدلله مافيني شي درست وتخرجت وصحتي اوكي
على فكرة اني مااؤيد السيريلاك لان سكريات واحسه يخليهم بعدها مايتقبلون خضرة وفواكه افضل الخضروات وفواكه والبديل لسريلاك شوفان مطحون او في دقيق ارز من شركات ثانية اعتقد بيبلاك بس طحين رز وفيتامينات اما سيريلاك في ناس تذمه لان مواد حافظة اي وشسمه اكبر غلط تحطون سيريلاك بالمرضعة ياكلونه عادي موبالمرضعة تراني مواام بس تعلمت هالاشياء
 

عاشقة حيدر 92

عضو متميز
المشاركات
965
النقاط
93
مشكورين ع الردود وجربت وياه الكرسي والمشايه وبعد ما فاد ما يرضى يقعد فيهم و كميه الحليب اعطيه قليل مو واجد ع عمره اني اعطيه بس ٩٠ مل و تكون ع فترات متباعده ومع ذلك ما يرضى ياكل عدل يطلع روحي حتي اذا جوعته وتالي عطيته اكل مال الجهال ما يرضى يأكله اذا اعطيه من أكلنا أشوة لكن السيريلاك والبسكويت يعفس الدنيا ولا يأكله الا بالغصب ادزه له واصلا اسوي له قليل ف غضارته واحط له قفشتين او ساعات ٣ سيريلاك يفقشه الحليب ماله الصغيره، الحين هداني عطيته بسكويته صبعه أكلها لكن وهو يفتر ما يرضى يقعد، الله يهديه ويصبرني
 

Ella

عضو متميز
المشاركات
712
النقاط
93
مسامحة اختي بس احس اسلوبج مو صح, انتي قاعدة تغصبينه والطفل عقله ليحين صغير وبيقعد يعاند وعادي يعني خير شر ماياكل بس عشان يثبت رايه, نصيحة خلي الاكل يمه وتركيه ياكل بروحه وقت ماخلص شيلي الاكل اما تقعدين على راسه ويلا خلص اكلك الحين او اوكل الحين مايصير! واذا جفتيه ما اكل شيلي الاكل ومع الايام بيعرف انه ايام الدلع ولت وانه الماما بتشيل الاكل اذا ماكليت :)

واذا عنده مشاكل مثل التوحد او غيره لازم تعاملينه معاملة ثانية تناسب حالته

اما تعطينه اكل فحلجه صبي شكبره بيدش سن المراهقة عقب سنة او سنتين خليه يعتمد على نفسه فالاكل وكل شي باجر يكبر ويطلع انسان محد يقدر يعتمد عليه

هاي كله على التعويد تره اذا عودتيه على شي خلاص! تصير عادة عنده! لكن عوديه على اكل وخليه بروحه ياكل يا يرقد بمعدة خالية او ياكل الي جدامه

حتى فالسفرة لما كلكم تاكلون لا تكلمينه ياكل او تقولين له يلا اكل بسرعة خليه ياكل براحته الين ما اهوة يقوم ودايما العصاري قطعي له فواكه وسلط عشان يعوض النقص فالفيتامينات اذا اكله قليل وبين فترة وثانية خليه ياكل اشياء يحبها عادي مابيضيره شي لو اكل وجبة سريعة مرة فالاسبوع
 

عاشقة حيدر 92

عضو متميز
المشاركات
965
النقاط
93
ادري اختي أيلا ان أسلوبي غلط اني اغصبه ع الاكل لكن ما ياكل حتي لو اخلي الاكل قدامه ولا أكلمه بس ينفر الاكل ويلعوز روحه وثيابه والمكان وما ياكل شي بس يلعب ف الاكل ويروح يتعبث ف الاشياء اني اعطيه موز وافوح له تفاح او ساعات اسويه بالملعقة وأعطيه الفواكه ساعات يأكلها بس الاكل الباقي مثل عيش دجاج سمج قلييل اذا ياكل ويطلع روحي، والحمدلله الولد سليم مافي توحد ولا شي بس شوي عنيد، افكر ف آكلات يحبونها الأطفال ف عمره وبحاول وياه والله يعيني لانه فعلا ياخد وقت اقل شي ساعه الا ربع ع ما ياكل ليي حبه شي عدل
 

ام حور

عضو متميز
المشاركات
1,529
النقاط
128
اخذيها قاعدة الطفل متى ما جاع راح ياكل ومدام مايحب اكل السريلاك خلاص
عطيه من اكلكم العادي وقللي الحليبووقت الاكل شغلي ليه طه هالقناة معذبة الاطفال
من يجوفونها خلاص يتجمدون وياكلون فخلش هادية ولا تعصبين وتقدرين تاكلينه لقمه
وتخلينه يلعب وعقب خمس او عشر دقايق ترجعين تعطينه الثانية او حتى تقدرين
تسوين ليه عصيرات في المرضعة او تخلطين الحليب وي فواكه
 

عاشقة حيدر 92

عضو متميز
المشاركات
965
النقاط
93
اشغل له التلفزيون ساعات يطالع شوي ويرد يبغي يتحرك هداني ها ليومين مطول بالي شوي وياه واحطه ف كرسي الاكل ويا رب يهدئ
 
المشاركات
76
النقاط
8
السيريلاك اصلا ولاهو زين ولاشي توني رايحة الصيدلية ادور شي اشتري لين عشان التقويم قريت مكونات السيريلاك مواد حافظة ومكونات شكثر واني كبيرة هونت وماشريته لصحتي تروحون تعطونه اليهال ليش؟
مايحبه مولازم مابينقص عليه الفيتامينات على سبة السيريلاك اةالبسكوت دلين مجرد مكملات مولازم كل ياهل ياكلهم يمكن الياهل ماعجبه طعمهم عادي
افضل الاكل الطبيعي العادي وتاكلون كلكم مع بعض وصبري عليه مادش السنة للحين مولازم يكون متين حتى يكون صحي وهو بيجوع وبياكل عادي ترى لاتضيقين نفسش اني كنت جذي قليلة اكل ووزني ناقص بعد على طول بس عادي اهم شي الصحة الحمدلله
 

عاشقة حيدر 92

عضو متميز
المشاركات
965
النقاط
93
ويش اسوي يا اختي هو الحمدلله صحته زينه لكن قبل فترة مرض ونزل وزنه وتبدل ودمه قاصر فقلت ابغي اعوض له قبل موعد تطيمعه لا يتبهدل وهداني اليوم ما عطيته اكل الجهال لا سيريلاك ولا بسكويت عطيته عيش وسمج والريوق فص جبن مثلث وغربلني شوي بس أهون من ادا اعطيه اكل الجهال
 

النهر الخالد

مشرف الأسرة والمجتمع
المشاركات
1,128
النقاط
128
السلام عليكم ورحمه الله وبركاته
شخباركم، اعاني من مشكله مسببه ليي ارق ومتعبتني لدرجه اني اصيح ساعات منها وهي ابني، عمره ١٠ شهور وما يرضى ياكل وما يحب شي اني أنوع له ف الاكل اعطيه سيريلاك وفارليز وبسكويت أصابع وأكل بيت سمج ، عيش، دجاج، شوربه، خبز، روتي، ورب وكل شي باستثناء لحم وربيان وعسل وحلاوه وخرابيط اجباس وجدي ما اعطيه ويتعبني ما يرضى ياكل شي ولا يحب شي وخصوصا اذا اعطيه اكل بالملعقة جنه ف معركه اني وياه اصارخ واعصب عليه ويقعد يصيح وأصيح اني بعد ع هالحال ما ودي اعصب عليه وأحاول أمسك أعصابي واسايسه لكنه واجد صعب وما يهتم ولا ينتبه ليي وكله يبغي يتحرك ويعفس الدنيا ع ما ياكل له حبة لقمه ياخد ساعه ويطلع روحي واجد تعبانه وياه ولا ادري ويش اسوي وهي اول ولد ليي وجه عقب تعب وعلاج وأني احبه واضايق اذا اعصب عليه لكن ويش اسوي شوروا عليي، وترا ما ظل شي ما حاولته حطيته له ف صحون ملونه وملاعق وأشغل له التلفزيون ساعات وهو بياكل وأقول له هم هم واكلمه واتحايل فيه ولا في فايده ما يرضى يقعد ف مكان ولا ياكل واذا كلش ياكل وهو يدور مني ومناك
غذاء الطفل وخصوصا في هذا العمر يتأثر لبعض الاسباب وهي لاتشكل خطورة
اذا عرفتي السبب سهل حل المشكلة
- كثرة الحركة وعدم أخذ الراحة الكافية من النوم
- نقص فيتامين او نقص بسيط في الدم
- التهاب اللوز
- الإمساك يسبب ضعف الشهية للاكل

فالحل بمحاولة معرفة السبب وحاولي تعودينه على الأكل في مواعيد محددة حتى يكون في أوقات منتظمة للوجبات
ولا ترغمينه على الأكل او تعصبين أمامه لعدم رغبته في الأكل مع التركيز على الاشياء الي يحب يأكلها وإذا كانت الأواني او الأدوات الي تحطين فيها الأكل ألوانها ملفته له فهذه تشجعه على الأكل لان الطفل في ها لمرحلة ينتبه للاوان
 

عاشقة حيدر 92

عضو متميز
المشاركات
965
النقاط
93
مشكور اخوي النهر الخالد اني حاول اخلي الوجبات ف وقت محدد بس مو منضبطه عدل وأخلي له الاكل ف صحون ملونه لكنه بس ف البدايه ينتبه وتالي عادي ما يهتم حاليا احاول كله اعطيه اكل البيت لانه ألاحظه يرغب له افضل من اكل الجهال السيريلاك والبسكويت والله يهديه، احتمال بعد لانت هو ف فترة تسنين بس للحين ما بين شي.
 

bad.life

عضو متميز
المشاركات
1,517
النقاط
113
・・・
ابني لا يأكل الطعام. ماذا أفعل؟

١- يجب إعطاء ثلاث وجبات رئيسية يومياً تكون في نفس الوقت.

٢- يجب عدم اعطاء اي من العصائر مع الوجبة الرئيسية.

٣- يجب عدم اعطاء الطفل أي من العصائر الجاهزة أو بطاط الشبس بين الوجبات. ويفضل اعطاء الخضار أو الفاكهه أو الزبادي أو المكسرات كوجبه خفيفه بين الوجبات الرئيسية.

٤- قدمي الطعام بطريقة حلوة وجذابة عن طريق تزيين الطعام وتقطيع الفاكهه والخضار على أشكال يحبها الأطفال.

٥- دعي طفلك يشارك في اختيار نوع الطعام الذي يريده. كذلك دعيه يشارك في تحضير الطعام وتزيينه. ومن ثم يمكنك اضافة نوع اخر بجانب الطعام الذي اختاره.

٦- يجب أن يكون وقت أكل طفلك في نفس وقت أكل الأسره. ويجب على الكبار أكل نفس نوع الطعام الذي يأكله الصغار. حيث ان الصغار يحبون تقليد الكبار.
٧- يجب على الأم والأب عدم ترك طاولة الطعام إلا بعد انتهاء الأبناء من الأكل.

٨- لا تقدمي الحلوى والشوكولاته كمكافأه للطفل.

٩- يجب غلق التلفاز وابعاد الالعاب عن الطفل عند الطعام ليكون تركيز الطفل على الأكل فقط.

١٠- لا تتحايلي على طفلك ليأكل (اي لا تكرري كلمة إكل أو يجب أن تأكل) فإذا وضعتِ الطعام ولم يأكل ارفعيه ولا تعطيه فرصة ليأكل أي شيء آخر حتى لا يشعره بالشبع. وسوف تلاحظين انه سوف يرجع ويطلب الطعام الذي رفضه. أو انه يتحمل الجوع ومن ثم لن يكرر هذا العمل مرة أخرى.

١١- احذري من اجبار طفلك على الأكل وتجنبي التعامل معه بقسوه لأن هذا يؤثر سلباً على تقبله للطعام وممكن ان يلجأ الى التقيؤ عمداً كردة فعل عكسية.

١٢- حاولي اقناع الطفل بأهمية الطعام للصحة وأهميته لجعله يكبر ويقوى.

١٣- من الطرق التي تشجع الطفل على الأكل هو جمعه مع أطفال آخرين حيث أنه اذا رأى صديقه يأكل فإنه سوف يتشجع ويأكل نفسه (غيرة الأطفال). ١٤- يجب معرفة ان هذه المحاولات تحتاج الى وقت لتحسين نظام تغذية الطفل. وهذه المده لا تقل عن ٣ أشهر.

١٥- يجب أن لا يستخدم الطعام أو الحرمان منه كعقاب للطفل.

إذا لم تنفع هذه الطرق فيجب مراجعة أخصائي تغذية
 

Alsayeda.88_A

عضو نشيط
المشاركات
416
النقاط
43
نفس بنت اختي الصغيرة بالضبط جدي ما ترضى تاكل اختي تقعد معها بالساعات على لقمة لقمتين عمرها سنة
 

عاشقة حيدر 92

عضو متميز
المشاركات
965
النقاط
93
اي اللي أولادهم جدي امهاتهم يعانون عموما اشكر كل اللي تفاعلوا معاي ف حل المشكله
 
الحاله
مغلق
 
مركز البحرين التجاري غير مسؤول عن أي اتفاق تجاري لا يكون طرفاً فيه. لذا يتحمل الطرفان البائع والمشتري المسؤولية القانونية الكاملة.
يتحمل كل عضو المسؤولية القانونية الكاملة دون مركز البحرين التجاري في أي تعليق ينشره في صفحات المركز وأقسامه.
 
الأعلى